KUNG molungtad ang gihimo nga oil exploration karon sa dakbayan sa Bogo ug sa lungsod sa Daanbantayan sa amihanan sa lalawigan, magkinahanglan kini og konsultasyon ug mas maayong makig-alayon sab sa mga lokal nga opisyal ang mga tigpasiugda niini.

Mao kini ang gipadayag ni Gob. Hilario Davide III ug wala siya mahinumdom nga nagpahibalo sa provincial government ang kompaniya nga nihimo karon sa oil exploration sa maong duha ka lungsod.

Una nang gitumbok sa Department of Energy (DOE) nga ang Forum Exploration maoy nangulo sa offshore ug onshore exploration.

Sigun ni Davide nga kung makalingkod na si incoming governor Gwendolyn Garcia, mas maayong mapahibalo usab kini sa kompaniya labot sa ilang kalihukan.

Kinahanglan sab ang konsultasyon tungod sa environmental impact niini.

Wala masayod si Davide kung dunay aktwal nga lana nga makuha sa maong mga dapit.

Kahinumduman nga susamang oil exploration ang gihimo sa lungsod sa Alegria diin nasuta nga dunay commercial value ang lanat ug hinayhinay na kini sa ilang operasyon sa produksiyon. (AZLG)