MAKAABLI na sa ilang sinehan ang SM City Cebu ug Ayala Malls sa higayon nga ilang makumpleto ug masunod ang mga lagda para mabatokan ang pagkatap sa coronavirus disease (Covid-19) sulod sa ilang mga establisemento.

Kini ang gipadayag ni Mayor Edgardo Labella human sa gipahigayon nga tigom kagahapon, Oktubre 7, 2020, diin ilang gihisgotan ang istriktong pagpatuman sa minimum health protocol ug ang 50 porsyento nga kapasidad sa ilang senihan. Moluwat siya og executive order alang niini.

“We listened to them. If they can give us a sufficient assurance that the health of moviegoers will not be compromised, then we might allow,” padayag ni Labella.

Ang mayor nibutyag nga ubos sa modified general community quarantine (MGCQ) nga mao karon ang status sa Cebu City sulod na sa 38 ka adlaw, wa una gitugotan ni Labella nga makabalik og operate ang mga sinehan bisan kon gitugotan na kini sa IATF sanglit ang local government unit (LGU) maoy adunay katapusang hukom. (PAC)