LAIN na usab nga lalake ang napalgang patay nga gilabay duol sa landfill sa Barangay Binaliw, bukirang dapit sa Siyudad sa Sugbo sa Huwebes sa kaadlawon, Mayo 30.

Mga residente sa sitio Binaliw 2 wa makaila sa biktima nga ilang gituohan nga didto lang gipatay sa mga mamumuno.

Adunay lima ka mga samad pinusilan sa lawas ang naangkon niini nga aduna pay piring ang duha ka mga mata sa biktima.

Matod ni Police Captain Jonathan Taneo, hepe sa Talamban police station, nga mga pasado alas 3 sa kaadlawon, adunay buto sa armas ang nadungog sa mga lumolupyo sa lugar.

Sa ilang pagsusi, usa ka tawo nga nagbuy-od nga patay ang ilang nakita hinungdan nga nanawag dayon sila sa Talamban police station.

Nagduda hinuon si Taneo nga didto lang gilabay ang biktima ug ang buto sa armas nga nabati sa mga residente posibling gisiguro lang sa mga killer nga patay na kini. (AYB)