CATBALOGAN City, Samar -Patay na nga nakit-an ang usa ka lalake nga nahug sa usa ka sapa sa Barangay San Andres pasado alas 2 sa hapon, Dominggo, Enero 19, 2020.

Giila ang biktima nga si Edgar Bacaltos, 49, motorcab driver, taga Barangay Mercedes ning dakbayan.

Base sa inisyal nga imbestigasyon, si Bacaltos kuyog sa iyang pamilya nga niadto sa Bangon Falls sa maong lugar.

Kalit nga nahug si Bacaltos sa sapa ug naanod gumikan sa kakusog sa bul-og sa tubig resulta sa pagbunok sa uwan.

Pagkadawat sa kapulisan sa maong report, nakig-alayon dayon sila sa Emergency Rescue Unit ug Philippine Coast Guard alang sa search and rescue operation.

Napakyas ang mga awtoridad nga maluwas ang biktima gumikan sa kalubog usab sa tubig sapa.

Alas 11:30 sa gabii, Enero 20, ang igsuon ni Bacaltos nidangop sa Police Station ug nipahibawo nga nakit-an na sa mga barangay tanod ang biktima nga patay na. (JKDP)