Ang rason nganong gipasirhan sa City of Talisay Traffic Operations and Management (CT-TODA) sayo sa gabii sa Lunes, Abril 18, 2022 ang Manipis Road mao ang landslide sa sityo Telepuno, Brgy. Manipis.

Yuta, mga bato ug kahoy nitabon sa karsada nga dunay gilay-ong mga 200 metros gikan sa sityo Langoyon diin nahitabo ang mudslide sa miaging semana atol sa pagkuso-kuso sa bagyong Agaton.

Matod ni Jonathan Tumulak, pangu sa CT-TODA, nga way clearing operations nga gipahigayon karong gabii tungod sa kangitngit sa dapit.

Duna pay padayong pagpangatagak sa mga debris hinungdan sa kakuyaw nga agian sa dapit.

Sayo sa buntag na sa Martes hawanan ang karsada, dugang ni Tumulak.