SA katuyoan nga mapalig-on ang relasyon tali sa Muslim community sa Sityo St. Michael, Barangay Pajac, Lapu-Lapu City, ang Philippine National Police (PNP) mibalik sa maong dapit alang sa peace talk ug feeding program.

Kon kahinumdoman, nahimong dugoon ang engkuwentro batok sa mga operatiba sa Lapu-Lapu City Police Office ug sa mga giingong sakop sa criminal gang sa dapit nga miresulta sa kamatayon sa pito ka mga armadong lalake duha na ka semana ang milabay.

Apan kagahapon sa hapon gihangop sa mga residente ang presensiya sa kapulisan nga gipangulahan ni PSSupt. Limuel Obon.

Mitambong sab ang mga sakop ug director sa National Commission on Muslim Filipinos – Visayas, Mano Manonggiring nga nanawagan sa iyang igsuong Muslim sa maong dapit nga mo-cooperate ngadto sa kapulisan aron nga mapatunhay ang kahusay ug kalinaw sa ilang lugar.

Iya usab gihangyo kadtong adunay kasayuran sa mga kauban sa pito ka mga napatay nga suspek sa pagpanulis, gun-for-hire nga makig-alayon sa awtoridad.

Samtang si Obon midasig sab sa mga residente sa St. Michael, Pajac nga dili magpanagana og report ngadto sa ilang buhatan sa higayon nga adunay kadudahang tawo sa ilang dapit ug dili angayang malisang sa higayon nga adunay presensiya sa pulis nga mosuroy sa ilang lugar.

Usa sa mga residente nga si Alex Mangangcong miingon nga ilang gihangop ang gihimo sa kapulisan sa pagkighimamat kanila ingon man ang feeding program.

Apan aduna silay hangyo sa kagamhanan sa siyudad nga kahatagan sila og puwesto diha sa merkado publiko aron sila maka-negosyo nga maoy kuhaan sa ilang inadlaw nga panginahanglan. (Ma. Devorah Taneo, USJ-R intern)