IPAUBOS sa bidding sa kagamhanan sa Lalawigan sa Sugbo ang Larsian barbecue food park nga anaa nahimutang sa Don Mariano Cui st., Capitol Site, Dakbayan sa Sugbo.

Mao kini ang gipahibawo ni Gobernador Gwendolyn Garcia niadtong Biyernes Enero 31, 2020 sa mga tigbalita.

Ang luna gipanag-iya sa Lalawigan sa Sugbo.

Matod ni Garcia nga mopaubos sa build transfer operate (BTO) nga pamaagi ang proyekto sa developer.

Ang maong paagi susama sa paagi sa pagpabarog sa duha ka mga edipisyo sa 1.2 hektaryang luna sulod sa IT Park.

Gipasabot ni Garcia nga ang kita sa duha ka mga edipisyo modungag na sab sa assets sa Lalawigan nga moabot sa P6.8 bilyones kon mahuman na.

Aron mas modako pa ang kita sa Probinsya, gilaraw ni Garcia ang pagpausbaw sa kantidad sa luna nga nahimutangan karon sa Larsian.

“We are looking at again. Looking at increasing the value of the property without disposing, without selling, because the build transfer operate scheme contemplates the improvements to be constructed on that property by the developer which upon completion is immediately turned over to the Province possession or ownership of whatever facility built becomes the ownership of the Province. At the same time they will be renting the property and will be sharing the Province a certain percentage of their revenue”, matod ni Garcia.

Hinuon matod ni Garcia nga anaa na kana sa desisyon sa developer kon magpabilin ba nga kan-anan ang maong lugar o dili na.

ILAGA

Sa laing bahin, buot ni Atty. Roy Salubre, provincial treasurer ug operations manager sa Larsian, imbestigahon ang usa ka tindahan nga nasakpan nga may ilaga nga naglatay sa gi-display nga mga sud-an nga lutuon.

Usa ka Facebook user ang nag upload sa usa ka video kon asa nakita ang dako nga ilaga nga nag latay sa mga sud-an.

Matod ni Salubre nga ang tindahan nakalapas sa balaod sa food park nga kanunayon ang paghinlo sa palibot sa stalls ug sigurohon nga limpyo ang mga gitinda niini.

Tungod sa maong hitabo, gimandoan ni Salubre ang sakop niini pagsusi sa tindahan ug pagsusi sa nanag-iya sa stall ug pahatagon og tubag kon ngano nga nahitabong may mananap nga naglatay sa mga sud-an.