Ang Cebu City Government nakabakuna og kapin 25,000 ka mga individual gikan sa ilang 90 ka vaccination sites sa dakbayan sa Sugbo atol sa unang adlaw sa National Vaccination Days nga molanat hangtod Disyembre 1, 2021.

Kini ang gibutyag ni Dr. Jeffrey Ibones, pangulo sa Cebu City Health Department, kinsa gitahasan ni Mayor Michael Rama sa preparasyon para sa tulo ka adlaw nga pagpamakuna sa tibuok siyudad batok sa coronavirus disease (Covid-19).

Si Konsehal Dave Tumulak, kinsa nitabang sa pagmonitor sa mass vaccination sa dakbayan, niingon nga angay pang pakusgan ang pagpahibawo sa maayong epekto sa bakuna ngadto sa sitio level.

“Sa atong observation, kinahanglan pa gyud nga palapdan ang information dissemination para maabot sa mga sityo ang pagpahibawo sa bakuna. Ato silang dasigon pa alang niadtong wala pa nabakunahi nga magpabakuna na labi na nga adunay nagpabiling hulga sa tibuok kalibutan sa Omicron variant kay ang bakuna makapanagang batok sa virus aron makab-ot nato ang herd immunity,” matod ni Tumulak.

Sa iyang bahin si Konsehal Joel Garganera, deputy chief implementer sa Emergency Operations Center (EOC) nagpasalamat ngadto sa mga tawo nga nisanong sa panawagan sa City Government sanglit ang gilantaw sa gobiyerno mao ra ang kaayohan sa katawhan ug malikay sa peligro batok sa virus.

LAPU, MANDAUE MALAMPUSON

Ang Dakbayan sa Mandaue mipasigarbo nga misaylo sila sa ilang target sa gidaghanon sa mabakunahan sa unang adlaw.

Sa mga alas 7:25 sa gabii sa Lunes, miabot na og 8,922 ang ilang nabakunahan, mas taas kaayo sa ilang target nga 7,500 sa unang adlaw.

Samtang ang Dakbayan sa Lapu-Lapu, sa mga alas 4 sa hapon, niingon nga nakabakuna na sila og 8,107 ka mga tawo sa ilang target nga 9,700 sa siyam ka sites.