MAGSUGOD na ang ting-uwan sunod semana, matod sa Pagasa -Mactan station.

Matod sa Philippine Atmospheric Geophysical and Astronomical Services Administration (Pagasa) Mactan, nga bisan wa pa silay official statement sa pagsugod sa ting-uwan, hayan magsugod kini sa sunod semana, nga maoy pagsugod sa hanging habagat.

Sa laing kalambuan, ang Pagasa Mactan niingon nga usa ka low pressure area (LPA) nga ilang gibantayan hayan mahimong tropical depression sa mosunod nga 48 oras.

Kon mahimo na kining TD, nganlan kini og “Butchoy.” “Sa atong latest analysis and model is padung sa Luzon,” matod ni Wilfredo Tamayo, taga Pagasa.

Niini, matod sa Pagasa nga ang Metro Cebu hayan makasinati og katag nga mga pag-uwan ug kilat, uban sa panagsang pagbunok sa uwan karong adlawa, Hunyo 10 ug 11.

Kini nagkanayon nga ang publiko ug Local Disaster Risk Reduction Management Offices nga nahingtungdan giawhag sa pagbantay sa rainfall/thunderstorm advisories ug Heavy Rainfall Warnings nga luwatan sa Pagasa Regional Services Divisions.

Matod sa Pagasa nga sa Hunyo, ang nasod hayan maigo og usa o duha ka mga bagyo nga hayan makaapekto sa PAR. (WBS)