Mananagat nga upat ka mga adlaw nga naglutawlutaw sa dagat human natikyaob ang iyang bangka naluwas sa laing lima ka mga mananagat sa alas 6:30 sa buntag sa Sabado, Septiyembre 17, sa kadagatan sa Surigao.

Si Police Chief Master Sergeant Ariel E. Capidos niila sa mananagat nga si Bimbo Bacharpa Sumonon, 34, taga Brgy. Lungsod-Daan, Mabini, lalawigan sa Bohol.

Matod ni Capidos nga si Sumonon nisaysay nga nanagat siya sakay sa iyang bangka nga de motor sa hapon sa Septiyembre 14, 2022 sa kadagatan sa Bohol dihang nakasugat siya og bati nga panahon.

Tungod sa kadagko sa mga bawod, natikyaob ang iyang bangka, apan nakakapyot ug nakatungtong siya niini sulod sa upat ka mga adlaw.