LAING mga punoan sa marijuana ang naibot sa kapulisan, mga sundawo ug mga ahente sa Philippine Drug Enforcement Agency (PDEA) 7 nga nangronda sa plantasyon sa Sityo Hagimit, Barangay Adlaon ug Sityo Hagnum, Barangay Lusaran, mga bukirang dapit sa Dakbayan sa Sugbo.

Ang dul-an sa 20,000 ka mga punoan sa marijuana nga nagbalor og P7.9 milyunes base sa Dangerous Drugs Board (DDB) value naibot sa Martes sa hapon, Septiyembre 24, matod ni P/ Lt. Col. Randy Korret, commander sa City Mobile Force Company.

Sa wa pa gipahigayon ang ronda, matod ni Korret nga ila unang gipanid-an ang dapit subay sa ilang gipatuman nga Oplan Frontier.

Matod ni Korret nga tungod sa kooperasyon sa mga opisyal sa duha ka mga barangay, ilang nahibaw-an ang mga ngalan sa mga nagtanom nga sila Joel ug Raymund, apan wa masayri ang ilang mga apelyedo.

Ang mga punoan gisunog ra usab samtang nagbilin og unom ka mga sanga o tukog nga gamiton nga ebidensya sa ipasakang kaso. Ang mga ebidensya gitugyan ngadto sa Regional Crime Laboratory 7.