PAAGI nga makabangon ang lokal nga ekonomiya sa dakbayan sa Naga gilibkas na ni Naga City Mayor Kristine Chiong ang Market Day schedule.

Kini subay sa rekomendasyon sa Task Force Against Covid-19 sa syudad gumikan sa padayon nga nasinating epekto sa pandemya sa nasud.

Tungod niini may kagawasan na nga makamerkado, mag grocery o maninda nga wala nay tumanon nga schedules.

Kahinumdoman nga gipatuman ang market schedule ug clustering sa syudad ug ubang mga kalungsoran sa probinsya sa Sugbo tuyo nga malimitahan ang pag dasok sa mga tawo sa mga tindahan og establisimento nga mahimo na unyang hinungdan sa pagkuyanap sa kagaw sa covid-19.

Karon nga gipaubos na sa mas luag nga restrictions sa community quarantine, gipaluagan usab sa kagamhanan sa syudad ang maong lagda.

Apan giklaro ni Chiong nga dili pasabot niini nga mahimo na nga mag tapok-tapok o mag pundok sa mga establisimento.

Ang tanan nga mga tindahan ug mga kan-anan gimandoan gihapon sa pagpatuman sa striktong mga lagda o protocols nga kinahanglan nga subayon sa mga customers aron masiguro nga matuman ang physical distancing, na monitor ang temperature ug kanunay ang pagpanghinlo ug pag disinfect.

Samtang alang sa mga Nagahanon, gimandoan sa pagdala gihapon sa Household card o quarantine pass kon mo gawas.

Gikinahanglan usab ang kanunay nga pag sul-ob og facemask ug faceshield aron malikay sa pagtakboy sa bisan unsa nga sakit.

Subay sa uwahing tala sa mga kaso sa syudad aduna kiniy 507 ka kompirmadong kaso sukad sa pagsulbong sa sakit sa miaging tuig diin 19 na lang niini ang aktibo human nakarecover ang 444 ka mga pasyente.(ANV)