PATAY na nga napalgan sa mga residente sa Timpolok Road, Purok Beauty in the Sky, Brgy Babag, Dakbayan sa Lapu-Lapu ang usa ka bag-ong natawong batang babaye alas 7 sa Martes sa buntag, Pebrero 11, 2020.

Ang masuso gibutang lang og daw sa nuog ug gibutang sa kalibunang bahin daplin sa dalan nga napuno usab og mga hait nga bato.

Gilangaw na kini dihang napalgan sa mga residente nga mao nay daling nanawag sa kapulisan aron masusi.

Matod ni Police Senior Master Sergeant Jude Abellana, desk officer sa Police Station 3 sa Lapu-Lapu City Police Office (LCPO ), wa na nila matumbok pila ka buwan ang bata, apan dako ang posibilidad nga bag-o pang gilabay ug natawo sanglit bag-o pang naputol ang pusod.

Dunay mga residente sa dapit nga nakakita og buak nga bildo nga nagkadugo duol sa nahimutangan sa bata.

Nagtuo sila nga kini maoy gigamit paghiwa sa pusod sa bata. Nanawagan ang kapulisan ni bisan kinsa nga adunay kasayuran sa posibleng ginikanan sa bata sa pagtaho sa ilang buhatan aron ilang ma-imbestigar.

“Sa pagkakaron, gi follow-up pa kinsay posibleng ginikinan nga way puangod ug nipanamastamas ato alang sa posibleng person of interest, kinsay nagbuntis, kinsay nanganak anha gyud na magsugod,” pagpasabot ni Abellana.

Human makuha ang bata sa kalibunan dali kining gidala sa Mother of Perpetual Help Parish sa Brgy Babag aron mabendisyonan sa pari sa wala pa gilubong.

Kon matumbok sa kapulisan ang naglabay niini, hayan mag-atubang kini ug tukmang kaso.

“Duha ka mga kaso ang posible ani, abortion or infanticide. Infanticide og natawo na ang bata unya namatay gilabay ug abortion gituyo gyud sa pagkuha,”pagpasabot ni Abella.