TALIWALA sa nahitabong pagpamumba sa Jolo Cathedral niadtong Domingo nga mikalas og 20 ka mga kinabuhi ug pipila ka mga nangaangol, mga manimbahay sa Simbahang Katoliko ang wa matarog sa ilang naandang bulohaton.

Wa kini makapabugnaw sa ilang pagtambong og Santos nga misa.

Si Lucresia Seno, 75, taga barangay Alang-alang, syudad sa Mandaue nitug-an nga matag adlaw maningkamot gyud siya nga makaduaw sa simbahan sa St. Joseph national shrine sa Mandaue ug mobisita usab sa Blessed Sacrament.

Matud niya nga ang matag adlaw nga pagsimba nahimo na niya kining panaad pipila na ka tuig ang nakalabay.

Iyang giangkon nga nakuyawan siya human makadungog sa balita, apan bisan pa niini, wa kini makapapugong kaniya ug iyang gitugyan ang tanan sa Kahitas-an.

“Nahadlok gyud, but para nako, 75 naman ko, makaingon na gyud ko nga ang tanan anaa sa pagbuot sa Ginoo, di gyud ta kaingon nga bisan molihay pata," saysay ni Seno sa Superbalita Cebu.

Mao usab kini ang gibarugan sa 54-anyos nga si Manolito Silva, usa ka sakop sa Oasis of Love. Naandan na ni Silva nga makasimba og ka-upat o kalima sud sa usa ka semana - sulod na sa uapt ka tuig.

“Dapat dinhi sa Cebu, pahugtan gyud ang pagbantay dire, kasagaran gud sa tirahan kanang Catholic church, pero mosimba gyud gihapon ko, at least 4 to 5 times a week. Wala man ta nahadlok kay salig man ta sa Ginoo, total naa man sad atong mga pulis,” ingon ni Silva.