ON LEAVE gihapon karon si Cebu City Mayor Edgardo Labella.

Ang iyang doktor nitambag kaniya nga mopundo una sa balay sud sa pipila ka adlaw samtang nagpaalim sa iyang infection sa dunggan.

Ang maong infection maoy hinungdan nga si Labella nipahuway una sa trabaho niadtong Miyerkules, Enero 20, 2021, human sa rekomendasyon sa iyang doktor nga mopahuway aron dali maayo sa sakit ug magpalayo una sa daghang tawo.

“I’ll just be in the house, but (I must) continue the treatment and avoid seeing people,” matod ni Labella kagahapon, Enero 24.

Matod ni Labella, nagtumar siya og antibiotics alang sa iyang sakit.

Gipaabot nga mobalik siya sa trabaho sa hinapos ning semanaha, diin unang gipaabot nga motunga na sa iyang buhatan niadtong Biyernes, Enero 22.

Si Labella nagkanayon nga ang City Government naa sa maayong kamot ni Bise Mayor Michael Rama isip acting mayor ug City Councilor Donaldo Hontiveros isip acting vice mayor.

Ang ear infection nadiskobrihan ni Labella diha niadto sa outpatient department sa usa ka priadong ospital alang sa pag-checkup niadtong Enero 15.

Unang gihungihung nga ang mayor na-coma apan dali kining gihimakak ni City Administrator Floro Casas Jr., kinsa niakusr sa mga kaaway sa pulitika ni Labella nga nagpakatap sa sayop nga balita o fake news. (JJL)