ANG mga nasunogan sa Duljo-Fatima, dakbayan sa Sugbo nalipay human gihatagan og libreng tubig gikan sa Metropolitan Cebu Water District (MCWD).

Si Camille Aurita, 20, usa sa mga biktima sa sunog nga nahitabo sa pagsulod sa Bag-ong Tuig ug nakahilak nga naghinumdom sa pagkaugdaw sa ilang balay.

Mapasalamaton siya sa MCWD human dunay tubig nga magamit taliwala sa ilang makaluluoy nga kahimtang huan sa sunog.

“Salamat sa MCWD kay importante jud namo ang gamit sa tubig. Naa mi mainom, magamit kung maligo, hugas ug pang-CR," matod ni Aurita.

Samtang nagkuha og tubig gikan sa gripo nga gimuntar sa MCWD, ang 57-anyos nga si Joseph Benavente, kinsa nasunogan sa iyang balay, nipadayag sa kalipay sa libreng tubig gikan sa MCWD.

“Dili na hassle molakaw og layo mangita og tubig kay naa ra sa among duol ug libre pa gyud,” matod niya.

Si Benavente nipili nga mopuyo sa ilang balay nga dako og kadaut mugna sa sunog.

Kabahin sa iyang social corporate responsibility, ang MCWD nihatag og libre nga tubig sa mga biktima sa sunog.

Ang MCWD nagpabiling nag-una nga tinubdan sa tubig sa pakigkombati sa kayo sa mga kaso sa mga sunog sa Metro Cebu. (PR)