ARON masiguro nga nisubay gihapon sa safety compliance ug lehitimo ang operasyon sa mga motorbanca sa rehiyon, nihimo ang Coast Guard Central Visayas inubanan sa Maritime Industry Authority (MARINA) 7 ug Department of Tourism (DOT) 7 sa Sustained Synchronized Maritime Safety Enforcement Patrol sa kadagatan sa isla sa Mactan ug kasikbit nga mga isla niadtong Huwebes, Hunyo 20.

Gawas nga masiguro nga luwas ang pagsakay sa publiko niining mga motorbanca, tumong usab sa kalihokan nga makadani pa kini og daghang turista sa Sugbo ug Central Visayas.

Moabot sa 22 ka mga motorbanca ang na-inspect sa nagkadaiyang ahensiya diin gisuta usab nila kon kompleto ba ang dokumento niini.

“Marina 7 will conduct mobile registrations for those motorbanca without necessary docs,” matod sa tigpamaba sa PCG 7 nga si Lieutenant Junior Grade Michael Encina.

Dugang niya nga molungtad hangtod Hulyo 3 ang inspeksyon sa nagkadaiyang parte sa rehiyon.

“Those who are recidivist, will be adjudicated po. Magbibigay din po kami ng window time for those who will comply with the documents, Sir. Bigyan po namin sila ng chance to comply, then if hindi po maka-comply, that would be the time po na ma-penalize po sila,” matod ni Encina.

Lakip sa giinspeksyon sa maong mga ahensiya ang bangka nga gigamit alang sa Island Hopping.

Usa ang isla sa Mactan nga daghang turista nga bisita tungod kay gawas nga duol sa tugpahanan, aduna usab kiniy nindot nga baybayon.

“Further, this endeavor will ensure that all their operations are legitimate and in accordance with the safety standard set forth by the authority,” dugang ni Encina.