USA ka dakung panagtigom ang gipahigayon sa Lay Organization/Confraternity sa Order of Discaled Augustinian kun O.A.D.

Gihimo ang ikaupat ka tuig na nga Biennial Assembly sa Hermandad de la Correa y de Santa Rita de Cascia sa Lalawigan sa Pampanga.

Kauban nila ang pipila ka kaparian ug devotees ni Sta. Rita.

Ang Hermandad adunay chapters. Sa Cebu gibahin sa tulo.

Naa sab sa Camiguin, Ormoc City, Butuan City, Nasipit, Pampanga ug Batanes.

Paghulagway sa mga Hermandad, dili ordinaryo ang kalihukan kay espisyal kini.

Tungod kay atol sa maong okasyon, gibisita nila ang nagkalain-laing simbahan sa Pampanga nga daku kaayo og natampo sa kasaysayan sa Pilipinas ingon man sa hugot nga Kristohanong pagtuo sa katawhan.

Dili kay kana ra tungod kay mismo ang Relikya ni Sta. Rita de Cascia nga mao ang iyang bakus nga kabahin sa iyang habit, milibot usab sa lain-laing simbahan.

Sama na lang didto sa mga lungsod sa Mexico, Sta. Rita, Sasmuan, Guagua, Bacolor ug sa Angeles City.

Gihatagan og dakung kahigayunan ang mga magtutuo nga maka-venerate ug makahawok sa Cincture Relic ni Sta. Rita.

Daku kaayo og pasalamat ang mga Kapampangan sa talagsaon nga oportunidad. Apan dili lang kutob sa Pampanga ang pagbisita sa relic kay niabot kini hangtud sa Basco Batanes.

Giduaw usab ang lainlaing mga simbahan didto.

Sa pakighinabi sa usa ka television station sa Pampanga, si Rev. Fr. Dennis Duene Ruiz, Postulator General sa Order of Discaled Augustinian ug instrumento sa katukoran sa confraternity,niingon nga “Ibinigay namin yong Canonical Erection Certificate because na-approve sila sa Roma. So I ask Cascia, the monastery of Sta. Rita if pwede kong mahiram ang belt relic the Cincture of St. Rita of Cascia dahil sila at Hermandad de la Correa of the Cincture of the belt. Pinahiram naman kaya dinala ko dito for general assembly”.

Sa mga wala mahibawo, si Sta. Rita de Cascia maoy giila nga Santa sa mga Imposible ug Desperadong mga Kaso (Saint of the Impossible and Desperate Cases).

Daghan na nga mga milagro ug mga pag-ampo ang natubag pinaagi sa iyang intercessions o pangama. Mabisita ninyo siya sa Chapel of Holy Relics sa Tabol Hill sa Barangay San Jose ning Dakbayan sa Sugbo.

Gani bag-o man lang gisaulog ang iyang kapistahan niadtong Mayo 22. (PR)