MOTIONG, Samar - Upat ka mga heavy equipment gisunog sa wa mailhing mga tawo sa Barangay Hinicaan ning lungsod, alas 12 sa kadlawon, Martes, Abril 1, 2019.

Ang mga heavy equipment iya sa 3S Marias Contruction nga gipanag-iya sa usa ka Nilda Obor, taga Buray, Palanas, Samar.

Ang mga heavy equipment nga gituyo pagsunog naglangkob sa usa ka Transit cement mixer, duha ka mga backhoe ug usa ka road roller kun pison.

Matod sa kapulisan, nireport kanila ang usa ka barangay kagawad bahin sa hitabo ug naabtan sa mga awtoridad nga sunog nga mga heavy equipment.

Padayon pa ang imbestigasyon sa insidente ug pag ila sa mga responsable niini.

Samtang sa Calbayog, Samar, 50 ka mga balay ang naugdaw sa sunog, alas 10:40 sa buntag, Sabado, Marso 30, 2019.

Ang kayo nagsugod sa balaylay sa usa ka Michael Madrigal.

Nasuta sa kabomberohan nga pulos ginama sa light materials ang mga balay nga nangasunog.

Si Police Lieutenant Colonel Joie Yape nipadala sa iyang mga sakop sa dapit pinangulohan ni Police Chief Master Sergeant Joseph Segadal uban sa upat ka taga Regional Mobile Force Battalion aron i-secure ang area. (JKDP)