MOBUKAS na unta sa ilang mga misa ang Basilica Minore del Santo Niño alang sa mga manimbahay karon nga gipailawom ang Cebu City sa general community quarantine (GCQ) sugod sa Agusto 1 ngadto sa 15, 2020.

Apan ila kining gikanselar human nipagawas og executive order si Mayor Edgardo Labella nga nag-limit sa relihiyusong panagtapok ngadto lang sa 10 ka mga tawo.

Si Padre Alladin Luzon nikompimar sa usa ka text message sa SunStar Cebu nga nag-ingon nga ilang ipadayon ang kada adlaw nga live broadcast sa ilang mga misa gikan sa Lunes ngadto sa Dominggo matag alas 8 sa buntag ug alas 2 sa hapon.

Niadtong Biyernes, Hulyo 31, ang Basilica nipahibawo nga ang publikong mga misa mobalik sa Agusto 2, Dominggo sa Pilgrim Center human nag-GCQ ang Cebu City sugod sa Agusto 1.

Apan niluwat si Labella sa iyang Executive Order No. 086 Series of 2020 sa gabii nga nagmando sa pag-limit sa relihiyusong panagtapok sa 10 lang ka mga tawo gawas kon dunay kausaban sa mosunod nga luwatang mga kamandoan.

Apan ang Basilicia ug Kandilaan padayong bukas sa pilgrims ug mga deboto gikan sa Lunes ngadto sa Sabado lang. Sirado ang Basilica sa Dominggo, matod ni Luzon. Bukas ang Basilica sa alas 6 sa buntag ug manira sa alas 7 sa gabii. (WBS)