SA Female Dormitory sa Cebu City Jail ibalhin ang 400 ka mga piniriso nga gikan sa Naga City Jail (NCJ).

Gibutyag ni Sr. Insp. Roberto Crisanto Alpon III, warden sa NCJ, nga sa katapusan ning buwana, hayan mabalhin na ang 400 ka mga bilanggo sa ilang pacilidad.

Ang mga babayeng piniriso sa Female Dormitory sa CCJ ibalhin sa bag-ong pacilidad sud ra usab sa compound.

Matod ni Alpon nga malangay og gamay ang pagbalhin sa mga bilanggo gikan sa ilang prisohan kay dunay himuon nga kausaban sa balhinan nga pacilidad diin butangan kini og dugang mga selda, magtaud og linya sa tubig ug uban pa.

Dili ra maghuot ang 400 ka mga bilanggo gikan sa Naga kay moabot og 700 ang masud sa Female Dormitory sa CCJ.

Kon si Cebu Provincial Detention and Rehabilitation Center (CPDRC) Warden Reynaldo Valmoria maoy pabut-on, siya nisuygot nga adto ibalhin sa bag-ong prisohan sa lungsod sa Argao ang mga priso gikan sa dakbayan sa Naga.

Sigon niini nga moabot sa 1,000 ang masud sa bag-ong pacilidad sa Argao.

Dugang ni Valmoria nga nihangyo gani sila sa korte nga ibalhin sa maong pacilidad ang kapin sa 200 nila ka mga priso aron maluagluagan sila og gamay. SCG