MOKABAT sa 59 ka mga police sa Mandaue City Police Office gipaubos sa basic firefighting seminar sa mga sakop sa Bureau of Fire Protection (BFP) sa Dakbayan sa Mandaue.

Gihimo kini Huwebes sa buntag, Mayo 2, diin gitudluan sila kon unsaon pagpawong ang bag-uhay lang nagsugod pagkayo, sama sa nagkayo nga liquefied petroleum gas (LPG).

Ang 59 ka mga police ipang-detail diha sa Police Assistance Desk sa gawas sa mga tunghaan, alang sa 27 ka mga barangay sa syudad sa Mandaue, karong Mayo 13 nga piniliay.

Ang matag PAD adunay duha ka mga pulis.

Ang training, gipasabot ni Police Colonel Julian Entoma, MCPO director, nga usa sa ilang security plan atol sa ilang city joint security control center meeting mao ang paghimo sa mga pulis nga first responder uban ang mga quick response team kon adunay di maayo nga panghitabo sama sa sunog atol sa piniliay.

Biyernes sa buntag, Mayo 3, usa ka simulation exercise ang himuon sa usa sa mga tunghaan sa Dakbayan sa Mandaue, kalabot sa mga posibleng election-related incident nga kinahanglang matubag dayon sa awtoridad.

“Naa man atong mga bombero, but dili bya gyud tanan polling places ang mabutangan og bombero ug firetruck. Naa lang sila andam sa certain mga lugar, ang ato gyud mga pulis nga naa sa PADS ang first responder. Ato na gipa-susi kon naa bay mga fire extinguisher ug ubang mga gamit alang sa pagresponde sa bisan unsa nga panghitabo diha sa mga tunghaan,” pagpasabot ni Entoma ngadto sa mga tigbalita.