MGA sakop sa kapulisan sa Dakbayan sa Calbayog, Samar, kauban ang mga taga Calbayog City Health Office, gipabuthan sa gituhoang mga sakop sa mga rebeldeng New Peoples Army (NPA).

Kini nahitabo sa highway sakop sa Barangay Lale, Pinabacdao, Samar, ala 1 sa hapon, Martes, Hulyo 27, 2021.

Matod sa kapulisan, padulong ang ilang convoy sa Department of Health (DOH) 8 aron magkuha og bakuna para sa Calbayog. Sa ilang pag-abot sa maong lugar, tulo ka mga buto sa armas ang ilang nabati ug mga 20 metros gikan sa likod sa patrol car, dunay kusog nga pagbuto.

Si Police Staff Sergeant Vito Jordan dali nga nitawag og back up gikan sa Pinabacdao Municipal Police Station.

Way naitala nga nakalas ug naangol sa insidente pero padayon nga nakaalerto ang mga awtoridad.

Gikondenar naman ni Police Brigadier General Ronaldo De Jesus ang hitabo.

Gikan sa pag abot sa mga bakuna sa Eastern Visayas, kini ang labing unang higayon nga nakasinati og harassment sa mga rebeldeng NPA ang mga awtoridad ug mga tinugyanan sa panglawas. (JKDP)