ANG Cebu City Government ug Metro Cebu Water District (MCWD) naghatag na og tubig pinaagi sa ilang mga tanker ngadto sa mga urban barangay sa dakbayan gumikan sa ka kuwang sa suplay.

Si Engr. Joel Biton, pangulo sa Department of Public Services (DPS) nagkanayon nga nag-average og 8 ka tanker ang ilang ma-deliver matag adlaw ug lain pang mga gagmay nga tanker gikan sa Local Disaster Risk Reduction and Management Office ( LDRRMO)ubos sa pagdumala ni Harold Alcontin sanglit hinay ngadto sa walay agas ang gripo sa (MCWD)

Si Charmaine Kara, ang public information officer sa MCWD nagkanayon nga nakasentro ang ilang paghatod og tubig sa barangay Sambag - 1, Sambag-2, Cogon Ramos ug Sta. Cruz nga gihulagway nga grabeng naigo sa pagkunhod sa suplay sa tubig.

Gikan sa 238,000 cubic meter matag adlaw nga maoy normal nga ma-suplay sa MCWD karon nikunhod na ngadto sa 215,000 cubic meter matag adlaw hinungdan nga adunay interapsyon sa agas sa tubig.

Ang distribution sa DPS naka-sentro usab sa barangay Carreta, Day-as, Lahug (Salinas Driver ug Kamagong), Lorega San Miguel ug Mabolo.

Ang tigpamaba sa MCWD nagkanayon nga apektado ang ilang suplay sa tubig gumikan sa grabeng kainit nga nasinati sa Metro Cebu.

Dugang ni Kara nga nawagtangan sila og 10,000 cubic meter sa Jaclupan dam, 4,000 cubic meter ang nawala Buhisan dam, 6,000 cubic meter sa CMWD.

Ang Suba Basbas nga gi panag-iya sa private supplier nawagtangan usab og 5,000 cubic meter gumikan sa problema sa plant ug 7,000 cubic meter sa Consolation gumikan sa pag sulod na sa part nga tubig sa ilang supply.

Gipadayag ni Kara nga gumikan sa maong problema, ilang gipapun-an og libuan ka cubic meter per day ang tubig nga mahatag sa Mactan Rock ug Pilipinas Water sanglit ang ilang ubang ground water source padayon pa nga gipang trabaho sa barangay.

Si Kara ug Biton niawhag sa mga barangay nga apektado sa pakig-coordinate sa ilang mga barangay kapitan para sila mahatdan og tubig. (PAC)