GIHULAGWAY sa mga militanteng grupo nga “incompetent” o banga ang Duterte administration hilabi na sa pagsulbad niining giatubang karon nga krisis sa nasod nga Covid-19.

Mao kini ang paghulagway sa mga militanteng grupo nga mipahigayon og lihok protesta pipila ka oras bag-o ang State of the Nation Address (Sona) ni Presidente Rodrigo Duterte kagahapon, Hulyo 27.

Lakip sa lihok protesta ang Bagong Alyansang Makabayan (Bayan) Central Visayas, Piston, Kabataan Partylist, Health Alliance for Democracy (Head), Alyansa sa mga Mamumuo sa Sugbo Kilusang Mayo Uno (AMA Sugbo-KMU), ug Kilusang Magbubukid ng Pilipinas (KMP).

“Sa iyahang ikalima nga State of the Nation Address, expected sa katawhang Pilipino, apil na sa mga Sugbuanon ang iyang pagpanghambong sa iyahang pagpalambo sa atong nasod, paglinla sa mga numero, ug pagpanghadlok sa katawhang Pilipino,” matod ni Bayan Central Visayas spokesperson Jaime Paglinawan.

Parehong ang duha ka protesta sa managlaing dapit, gisita kini sa kapulisan apan wala kini igong rason.

Usa ang gihimong programa sa Bayan Central Visayas sa ABS-CBN Corp. sa Jagobiao, Mandaue City nga gibadlong sa sa kapulisan dihang nagsugod ang programa.

Dugang ni Paglinawan nga ang kasamtangan nga estado sa Pinoy, nag-antos gihapon kini sa kalisod. (HBL)