ORMOC CITY, Leyte - Gipahigayon ang Modern Pentathlon Test Event sa Philippine Southeast Asian Games Officiating Committee (Phisgoc) sa Subic, Zambales Miyerkules, Oktubre 9, 2019.

Sa maong aktibidad, gipasigarbo ni Ormoc City Mayor ug Philippine Modern Pentathlon President Richard Gomez ang mga players nga pulos taga Ormoc ug mao'y modala sa bandera sa Pilipinas sa Southeast Asian Games sa Disyembre.

Kumpyansa usab si Gomez nga makuha sa Philippine Team ang kampyonato sa maong sporting event sa SEA Games.

"I am proud that Ormoc's Laser Run team is among those competing in the test event and I am confident they can make it to the SEA Games," matod ni Gomez.

Kaniadtong 2018, gisugdan sa Ormoc City ang Laser Run nga nakadani og daghang mga Ormocanon nga moapil sa maong sport.

Gani, nakaapil na usab og kompetisyon ang Ormoc Team sa gawas sa nasud.

Usa kini ka Olympic sport ug malaumon usab si Gomez nga puhon duna'y Ormocanon nga Olympian.

"Ormoc is not only a city of beautiful people. It is also a city of beautiful champions," dugang ni Gomez.

Sa wala pa nahimong mayor si Gomez, pirmi uwahi ang Ormoc Team sa mga sports event apan sa iyang paglingkod pagka Mayor sa Ormoc, sunod-sunod na nga nakuha sa Ormoc Team ang kampyonato sa bisan unsang sport event ug nahimo usab nga kampyon sa Eastern Visayas Regional Athletic Association (Evraa) sud sa duha ka tuig.

Base sa medal standing sa Evraa 2019, 162 ka gold medals ang nakuha sa Ormoc, 97 ka silver ug 69 ka bronze diin mas daghan kini kumpara sa tuig 2018.

Naobserbaran usab sa mga taga Ormoc ug laing lugar ang grabe nga suporta nga gihimo sa mayor sa mga atleta sama sa paghatag og mga dekalidad nga mga gamit ug ekipo nga wa nila masuwayi kaniadto. (Superbalita Cebu)