MARINE type, emergency, ug automatic.

Mao kini ang mga klase nga gasolinahan ang plano karon nga ipatuman sa Department of Energy sa di pa matapos ang tuig.

Gibutyag ni Engr. J. Rey Maleza, officer-in-charge sa Energy Industry Management Division sa DOE Visayas Field Office, nga sa pagkakaron ilaha pang gipahimutang ang standards niini ngadto sa Bureau of Philippine Standards aron hingpit na kini nga mapatuman.

Ang mapatuman karon mao kining emergency type nga gasolinahan diin panahon sa kalamidad, trucking nalang ang gasolina ug butangan kini og hose ug pump aron diretso kini nga makapagawas og gasolina.

Apan giklaro ni Maleza nga kinahanglan nga aprobado kini sa local government unit (LGU) aron ma-monitor kini nila ilabi na nga lisod ang pagsud sa produkto sa petrolyo panahon sa kalamidad.

Laing gihimoan na nila og standards kining Marine Type nga gasoline station diin diha na magpakrudo ang mga mananagat sa ilang pumpboat.

“So we offer a new type of gasoline station, we call it marine type nga naa ra siya’s daplin sa dagat aron kadtong mga pumpboat didto nalang sila magpatubil,” saysay ni Maleza nga nahinabi sa Superbalita Cebu.

Gibutyag usab niya nga posible nga karong tuiga mabutangan na og automatic gasoline station ang nasod diin mao kini ang gipangtukod na sa laing nasod.

Wa na kini gasoline boy ug ang driver na ang mismong mo operate niini ug magtubil sa iyang sakyanan gikan sa gasolinahan. (HBL)