GIINGONG killer ug bigtime drug pusher ug naa sa number 1 sa most wanted persons list sa lungsod sa Pinamungajan nasikop human nipiyansa sa kaso alas 5:55 sa hapon sa Lunes, Abril 4, 2022, sa Centro, Brgy. Poblacion, dakbayan sa Mandaue.

Ang suspek giilang si Charlie Lihaylihay Pono, 31, minyo, taga Sitio Campo, Brgy. Poblacion, lungsod sa Pinamungajan.

Si Police Major Vincent Zozobrado, hepe sa Pinamungajan Police Station nga nahinabi sa Superbalita Cebu, nagkanayon nga si Pono number 1 most wanted person sa ilang lungsod gumikan sa kasong pagpatay.

Si Pono nipiyansa unta sa kaso sa ginadiling drugas human nasikop sa kapulisan sa Mandaue City.

Matud ni Zozobrado nga nakadawat sila sa impormasyon kabahin ni Pono hinungdan nga ilang gi-serve ang warrant sa kasong murder gikan sa Regional Trial Court, Branch 59, dakbayan sa Toledo nga giluwatan ni Judge Judelyn Hugo Tapia-Menchavez.

Ang kasong murder gipitsahan og Abril 1, 2022 nga walay piyansa nga gitugot.

“Ngilgig ning tawhana, Sir, dunay agi. Siya ang top 1 MWP sa amo station. Didto ni gi-serve ang warrant sa PS 1 MCPO kay nadakpan man ni siya didto, drugs ug armas. Nya nipiyansa man so, gisugat sa pagdakop dihang nigawas (sa korte),” dugang ni Zozobrado.

Si Pono napriso niadtong 2017 sa Pinamungajan tungod sa ilegal nga paghupot og armas.

Nakapiyansa siya ug naka-avail sa probation. Apan samtang under probation, nadakpan og balik kay namaligya og illegal nga drugas. Pero nakagawas niadtong June 2021. Human niini nisibat ug nagtago-tago kay nakapatay niadtong Nobiyembre 2021. (GPL, TPT)