GIISYUHAN og Enforcement Inspection Apprehension Report ug Notice of Hearing ang kapitan sa motorbanca nga nibiyahe gyud gikan sa Bohol paingon sa Sugbo bisan wala’y clearance sa Coast Guard.

Sakay ang 20 ka box sa isda ug 23 ka pasahero lakip niini ang duha ka tripolante ug kapitan niini, nasikop sa Coast Guard Cebu ang usa ka motorbanca nga nibiyahe gyud gikan sa Getafe, Bohol paingon sa Pasil, dakbayan sa Sugbo.

Ang Coast Guard Special Operations Unit gidakop ug temporaryo nga gi-confiscate ang MBCA Mon-Jin nga naatlan sa kadagatan sa Shell Island sa lungsod sa Cordova.

Nasikop ang maong bangka Biyernes sa udto, Agusto 9, 2019.

Base sa pakisusi sa Coast Guard Cebu nga nibiya ang maong bangka sa Nasingin, Getafe, Bohol.

Naila ang kapitan niini nga si Ferdinand Camacho diin nasuta nga way dokumento ug rehistro ang maong bangka.

Tungod sa Gale Warning, wala pa’y byahe nga gitugotan nga mobiyahe kon 250 gross tonnage ug paubos ang sakayang pandagat niini. (Superbalita Cebu)