Usa ka 27-anyos nga lalaki namatay human sa panagbangga sa motorsiklo sa Barangay Ginablan, lungsod sa Badian, habagatan sa lalawigan sa Sugbo sa Huwebes sa hapon, Hunyo 16, 2022.

Si Lieutenant Etelberto Timagos, hepe sa Badian Municipal Police Station, niila sa biktima nga si Hadrian Jade Manlunas Leceña, taga Montañeza, lungsod sa Malabuyoc, Sugbo.

Si Timagos nisaysay sa SunStar Cebu nga ala 1:25 sa hapon, ang ilang buhatan nakadawat og tawag sa telepono bahin sa hitabo.

Ang kapulisan niadto dayon sa dapit ug nakompirmar nga duha ka mga motorsiklo ang nagkabangga sa kurbada nga dalan sa Ginablan, Badian.

Usa sa mga drayber namatay nga si Hadrian Jade Manlunas Leceña, taga Montañeza, lungsod Malabuyoc, Cebu. Si Timagos nikompirmar nga ang drayber sa laing motorsiklo mao si Samuel Cauba Tabanao, 45, taga Barangay Ginablan, Badian, Sugbo.

Base sa imbestigasiyon, ala 1:20 sa hapon, si Leceña, nagmaneho sa motorsiklo padulong sa habagatan, niadto sa Malabuyoc ug si Tabanao nagpadulong sa ilang dapit. Nabunal ang ulo ni Leceña sa sementadong dalan ug ang duha ka mga motorsiklo pulos nangadaut.

Ang Badian Municipal Disaster Risk Reduction and Management Office (MDRRMO) nidala kang Leceña ngadto sa Badian District Hospital apan gideklarar nga dead on arrival sa ala 1:43 sa hapon sa Hunyo 16, 2022.

Ang pamilya ni Leceña niadto na sa ospital ug nikuha na sa lawas sa biktima. Ang pamilya determinadong mokiha batok kang Tabanao.

“As family of the victim, sakit sa ila nahitabo pero wala pa ta kahibaw in the coming days basin ma settle ra. Pero as mao ang sakto buhaton kailangan ta file og appropriate charges against aning suspek,” matod ni Timagos.