BUOT ni Gobernador Gwendolyn Garcia nga ipaubos sa swab testing ang tanan nga mga Sugboanon nga buot mopauli sa kalungsoran sa probinsya sa Sugbo kon sila gikan sa Siyudad sa Sugbo, Mandaue ug Talisay.

Ang Cebu City ug Mandaue ubos pa sa enhanced community quarantine (ECQ) samtang ang Dakbayan sa Talisay ubos sa modified enhanced community quarantine (MECQ).

Kini maoy nahiusahang hukok sa kadagkoan sa amihanan nga bahin sa Sugbo kagahapon Mayo 20, 2020.

Gipasabot sa mga mayor ang ilang mga kabalaka labot sa mopauli nga mga lumolupyo sa ilang lungsod.

Usa na niana ang seguridad sa panglawas sa mga konstituwente.

Si Garcia niklaro nga ang mga Sugboanon sa probinsya nga buot mopauli sa laing lungsod mahimo nga way swabbing kon gikan sa lugar nga GCQ paingon sad sa lugar nga nag-GCQ.

Apan kon gikan sa syudad sama sa Talisay, Sugbo ug Mandaue, mosubay gihapon sa mga protocol.

"Ang atong polisiya nga gusto mopauli sa mga lungsod, makauli man na sila anytime kanang gikan sa probinsya," matod ni Garcia.

"Kung gikan sa Cebu City kinahanglan mananghid sa mayor kay aron ang mayor kon mosugot, mag-andam," matod ni Garcia.

Tungod sa padayong hulga sa coronavirus disease 2019 (Covid-19) sa mga lugar nga gipaubos pa sa ECQ, buot ni Garcia nga mopaubos sa swab test ang kadtong mopauli sa probinsya.

Kini kon mosugot usab ang mayor nga papaulion na kini sa lungsod.

"Pero ang buhaton ana og gikan sa City of Cebu maayo ug maka testing na sila, mapa swab una na sila. We will assist diri sa Kapitolyo. Kon anaa sila sa Cebu City, dali raman sila maka adtog Capitol kay aron ipa test, para pawa lang sa inyong kakulba ba",matod ni Garcia.

Giklaro niya nga sa kasamtangan, ang mga Sugboanon nga adunay simtomas sama sa Influenza like illnesses (ILI) ug Severe Acute Respiratory Infection (SARI) ang gi hatagan og dakong pagtagad sa pangagamhanan, pag paubos sa testing.

"For as long as naa mi swabs, kay we have limited swabs man. Remember nga kon we run out of swabs, we are also prioritizing those that nag show og symptoms so i-prioritize lang gyud usa namo kon naa mi mabilin amo i-apil. Pero og kana kon usa na gyud ka barangay ang mouli, aw kana di nagyud na namo kaya," matod ni Garcia. (ANV)