HUMAN gianunsyo ni Gobernador Gwendolyn Garcia ug ni Cebu City Mayor Edgardo Labella nga ipaubos sa Enhanced Community Quarantine ang dakbayan ug probinsya sa Sugbo tungod sa hulga sa coronavirus disease (Covid-19), daghang mga tawo nag-panic buying tungod sa kahadlok nga mahutdan og supply ug wa nay mapalit.

Kasagaran sa mga mall ug dagkong mga tindahan sa dalan Colon gikakubtan sa Huwebes, Marso 26, 2020, sa daghang mga tawo. Mao kini usab ang mga talan-awon sa ubang mga dapit sa Metro Cebu.

Mga alas 6 pa lang sa buntag, nagsugod na og tapok ang mga tawo gawas sa grocery stores, mga botika ug uban pang mga tindahan sa basic nga mga panginahanglanon.

Apan, wa makapalit og daghan ang mga tawo nga nanaglinya kay gawas nga gikontrolar sa mga tindahan ang gidaghanon nga makasulod, gi-limit usab matag konsumidor ang gidaghanon sa mapalit.

Labina sa Dakbayan Sugbo nga dunay bag-o lang napasar nga ordinansa batok sa hoarding ug panic buying.

Si Avelyn Rena, 47, nagpuyo sa dakbayan sa Talisay, nagtrabaho sa dakbayan sa Mandaue, niingon nga siya mahadlok nga masirad-an sa grocery stores kon sanglit ipatuman na ang lockdown.

“Mahadlok ko nga wala na nya unta koy mapalit maong karon dali-dali kog pamalit sa mga gamitonon,” saysay niya.

Si Christy Anacma, 28, frontliner nga nagtrabaho sa usa ka inila nga ospital sa Siyudad sa Sugbo, niingon nga siya nangompra aron aduna siyay mabalon kon mo-duty niya tungod kay di na sila makagawas sa iyang gitrabahoan nga ospital. Samtang nipahayag si Lelyn Caborada nga human sila nakadungog sa balita nga i-lockdown ni Garcia ang tibuok Sugbo, sila nagplano na nga mag- grocery.