MGA alas 4 pasado sa Biyernes sa hapon, si Allan Ceballos Zapanta, 39, nakagawas sa bilanggoan human mabilanggo niadtong Nobiyembre sa duha ka mga kaso.

Apan mga alas 7:50 sa gabii sa samang adlaw, patay na siya human pusila sa duha ka mga tawo sa Sityo Riverside, Barangay Poblacion Oriental, mga usa ka kilometro ang gilay-on gikan sa iyang balay sa Barangay Polpogan.

Si P/Staff Sgt. Rhexter Armenion sa Consolacion police niingon nga wa pa gihapon silay lead sa pagpatay kang Zapanta.

Matod ni Armenion nga wa pa sila masayod nganong si Zapanta niabot sa dapit.

Si Zapanta napriso sa kasong kalapasan sa Batas Pambansa 6 kun pagdala og mahait nga hinagiban ug alarm and scandal.

Gitugotan siya nga makagawas human niangkon sa iyang sala.

Nagtuo ang kapulisan nga posibleng pagpanimawos ang hinungdan nganong gipusil si Zapanta.

Nasuta usab nila nga dunay kasuko ang killer kang Zapanta base sa mga samad pinusilan.

Nabulit sa samad ang lawas ni Zapanta.

Lakip sa gipusil ang duha ka mga mata ug ulo, timailhan sa grabeng kasuko sa killer kaniya.

Awaaw ang dapit hinungdan nga naglisod ang kapulisan sa pag-ila sa duha ka mga killer. /