Gisikop sa Lapu-Lapu City Police Office (LCPO) ang duha ka mga mananagat nga naatlang nangisda sa marine sanctuary sa Barangay Coahagan sa isla sa Olango, dakbayan sa Lapu-Lapu kagahapon sa buntag, Hunyo 9, 2021.

Ang mga nadakpan nailhang sila si Romulo Abayan Tero , 43, ug Sarle Curib Cutamora, 48, mga molupyo sa isla sa Nasingin sa lalawigan sa Bohol.

Nakuha gikan sa mga dinakpan ang moabot sa 25 kilos nga nagkadaiyang isda nga gisulod og Styrofoam box.

Lakip sa nasakmit mao ang usa ka pagi o stingray nga endangered specie.

Nakuhaan usab ang mga dinakpan ug usa ka pumpboat ug pasol nga maoy gigamit sa ilang pagpangisda sa lugar.

Base sa imbestigasyon sa Olango Police Station sa LCPO nasikop ang duha ka mga mangingisda dihang nagpahigayon og seaborne patrol ang grupo nila Police Staff Sergeant Lemuel Celestial, pasado sa alas 9 sa buntag.

Gikatakda silang pasakaan ug kasong kalapasan sa RA 8550 kuno illegal fishing sa marine sanctuary.

Si Lapu-Lapu City Mayor Junard Chan, sa iyang bahin, wala mahimuot sa gibuhat sa duha ka mananagat.

Iyang gihulagway ang isla nga abunda sa marine life hinungdan nga kanunay bisitaon sa mga lokal ug langyaw nga turista.

“Ato gyud nang gipanbantayan diha kay one of the best diving spot n. Napuno gyud na sa corals, napuno na sa isda,” matod ni Chan. (GCM)