Giingong bad boy sa ilang dapit napatay sa kapulisan human nisukol sa ilang pagresponde sa pagpabuto sa armas alas 11: 50 sa gabii sa Sabado, Pebrero 27, 2021 sa Brgy. Apalan, Lungsod sa Tuburan.

Ang napatay giila sa kapulisan nga si Jade Montebon, 22, construction worker, taga Brgy. San Juan. Nasikop ang iyang kauban nga si Rogelio Salundaga, 38, taga Brgy. San Juan, Tuburan.

Si Police Station Sergeant Mark Joseph Toring, imbestigador sa Tuburan Police Station nga nahinabi sa Superbalita Cebu, nagkanayon nga gialarma ang duha human mangahubog, nanghasi pinaagi sa pagpabuto sa ilang armas.

Matod ni Toring nga sa pagrespondi sa ilang mga kauban, nahitabo ang ginukdanay tali nila ni Montebon, Salundaga nga nagsakay og motorsiklo ug kapulisan. Si Salundaga maoy nagmaniho sa motorsiklo samtang angkas si Montebon.

Atol sa ginukdanay, si Montebon nibunot sa iyang .38 kalibreng revolver, nition sa naggukod nga pulis. Apan naunhan siya sa pagpabuto sa mga pulis, naigo siya sa hawak.

Gidali sa pagdala sa Tuburan District Hospital si Montebon, apan dihang ibalhin na unta sa tambalanan sa dakbayan sa Sugbo, namatay siya ala 1 sa kaadlawon sa Dominggo, Pebrero 28. (GPL)