USA ka 49-anyos nga negosyante ang nasikop human nangwarta sa usa ka aplikante alang sa Bureau of Fire Protection (BFP)-Central Visayas.

Nasikop pinaagi sa entrapment operation sa Criminal Investigation Detection Group sa Negros Oriental ang usa ka Maria Nilda Maniwang alyas Neneng, minyo, taga Barangay Dela Paz, Dakbayan sa Antipolo, alas 6:30 Sabado sa buntag, Mayo 11.

Ang entrapment gihimo sa Poblacion, Sibulan.

Si Maniwang ang giingon nga nagpakaaron-ingnon nga aduna'y impluwensya nga maka-recruit og mga aplikante aron mahimo nga bombero sa BFP-Cental Visayas.

Ang aplikante sa BFP-Central Visayas gipangayuan og P150,000 bugti sa usa ka slot alang sa BFP recruitment.

Si Maniwang ang giingon nga taud-taod na nga nahimong sakit sa ulo sa BFP-Central Visayas tungod sa panggamit niini sa ahensya aron makakwarta.

Kasong swindling ug estafa ang ipasaka batok kang Maniwang. (FMD)