NAMATAY diha-diha dayon ang usa ka negosyante nga taga Dakbayan sa Toledo human pusila pasado alas 10 Huwebes sa gabii sa wa pa mailhing killer nga nagsakay og motorsiklo.

Si P/Cpl. Michael Vincent Balicoco sa lungsod sa Pinamungahan nga nahinabi sa Superbalita Cebu, niila sa namatay nga si Wilmer Villarmia, lumolupyo sa Sitio Buswang, Barangay Cambang-ug, Dakbayan sa Toledo.

Sa imbestigasyon sa kapulisan sa lungsod sa Pinamungahan, si Villarmia gikan sa Dakbayan sa Toledo nag-inom sa usa ka imnanan sa Siyudad.

Iyang kauban ang iyang saleslady nga si Rochelle Pacillos, 20, taga Barangay Tajao sa maong lungsod.

Dihang pauli na ang sales lady sa balay niini, siya gihatod ni Villarmia.

Pag-abot sa Sityo Polupogan, Barangay Tajao, duol sa balay ni Pacillos, ang babaye nakadungog og mga buto sa pusil gikan sa ilang likod.

Wa magdugay natumba ang motorsiklo nga gisakyan nila ni Villarmia ug Pacillos.

Gihikap ni Pacillas ang iyang kaugalingon kon duna ba siyay mga igo sa lawas.

Iyang nasuta nga wa siyay mga samad bisan giingong naa siya sa likod nag-angkas samtang ang gunman naa usab sa likod nagsunod.

Sunod nga gihikap niya si Villarmia ug didto na nahibaw-an ni Pacillos nga naigo sa ulo ang biktima.

Patay nang naabtan sa medical personnel si Villarmia tungod sa mga igo sa nagkadaiyang bahin sa lawas.

Duha ang gitan-aw sa kapulisan. Kini hayan may kalambigitan sa personal nga bangi ug ribal sa gugma o love triangle. (BBT)