ORMOC City, Leyte - Number 1 sa mga most wanted sa San Isidro, Leyte napatay sa kapulisan ning siyudad, Martes, Hunyo 30, 2020.

Giila ang suspek nga si Rodel Arcenal, taga Tabango, Leyte.

Matod ni Police Lieutenant Rex Cantilep, spokesperson sa Ormoc City Police Office, si Arcenal nag-atubang og mga kasong frustrated ug attempted murder.

Duna siyay duha ka mga warrant of arrest sa giatubang nga mga kaso ug nagtago sa Tzu Chi Village, Barangay Liloan, ning siyudad.

Base sa pamahayag sa kapuyo ni Arcenal, kulatado siya niini ug dihay higayon nga gibunalan siya og armas.

Ang kapitana sa barangay gihulga usab ni Arcenal hinungdan nga gi-report siya sa kapulisan.

Sa pagsusi sa kapulisan pinaagi sa hulagway, ilang nakita sa ilang files nga most wanted si Arcenal sa lungsod sa San Isidro.

Gilusad sa kapulisan sa City Intelligence Branch (CIB) ang operasyon batok sa suspek sa gipuy-an niini.

Imbes mo surrender, misukol siya sa kapulisan gamit ang kalibre .45 nga pistola.

Nibawos ang mga pulis og pamusil agi og depensa hinungdan nga napatay nila si Arcenal.

Si Mayor Richard Gomez, kinsa niadto sa crime scene, nagkanayon nga bisan sa giatubang nga krisis sa Covid-19, di makalimot ang gobyerno ug awtoridad sa paggukod sa mga kriminal ug mga ilegalista.

“Diri sa Ormoc, number 1 sa ato ang peace and order. Bisan na busy ta sa Covid, ang ato kapulisan padayon gihapon sa trabaho,” matod sa mayor. Gipangita pa karon sa kapulisan ang mga kauban ni Arcenal. (JKDP)