ORMOC CITY, Leyte -- Laing pasidungog na usab ang nakuha sa Dakbayan sa Ormoc nga gihatag gikan sa Department of Interior and Local Government (DILG).

Sa ikatulong higayon, nakuha na usab sa dakbayan ang Seal of Good Financial Housekeeping (GFH).

Si Ormoc City Mayor Richard Gomez nagpasalamat sa mga kawani sa city hall nga mitabang sa iyang administrasyon nga mahapsay financial management sa siyudad.

Ang maayong koleksyon sa mga tax ug padagan sa treasurer office ang usa sa gitumbok nga rason sa maong award.

"That means maayo ang imong padagan sa treasurer office, maayo ang collections and maayo ang singil sa RPT (Real Property Tax)," matod ni Gomez

Matod sa mayor nga strikto usab ang siyudad kabahin sa mga expenditures sa matag departamento ug gigamit sa insakto ang budget.

"Apil diri nga kada department kinahanglan insakto ang ilang expenditures, recorded on time and ilang mga budget magamit og insakto," dugang sa mayor.

Gitagaan usab og gibug-aton sa mayor nga walay mga kuwang nga dokumento ug dunay transparensiya.

Daghan pa nga awards ang buot makuha sa kagamhanan sama sa Galing Pook Award ug Kalasag Award.

Gitagaan usab og importansya ni Gomez ang paghatag og pagsalig sa mga department heads ug mga kawani.

"Kana ato mga department heads we really asked them to work well. Nagtrabaho sila og maayo, nagtrabaho sila'g sakto, talagang nag-deliver sila. That is what is happening diri sa ato sa Ormoc," dugang sa mayor.

Gawas sa Ormoc, nakakuha usab sa maong award ang lungsod sa kuwatro distrito sama sa Kananga, Merida, Matag-ob, Palompon ug Isabel Leyte. (JKDP)