DUL-AN sa 10 milyones ka pesos nga balor sa drugas ang nasakmit sa managlahing anti- illegal drug operation nga miresulta sa pagka sikop sa upat ka mga drug personalities.

Sa unang pagpangronda nga gihimo sa Pardo Police Station 7 nga gipangulohan sa ilang hepe nga si PMaj. John Kareen Escober, nadakpan ang usa ka Jhanron Ministerio alays Anggo, 32 anyos, usa ka habal-habal driver nga taga Nivel Hills, Barangay Busay, siyudad sa Sugbo.

Nakuha gikan kang Ministerio ang shabu nga moabot ngadto sa 320 gramos nga mokantidad og dos milyones ka pesos.

Pasado alas nueve nianang Lunes sa gabii, laing nadakpan sa Drug Enforcement Unit sa Labangon Police Station 10 sa A. Lopez, ang usa ka ginang nga si Vera Abellan Rama, 33, alyas Lapad, nga may upat ka mga anak.

Pinangulohan sa ilang hepe PCapt. Jonathan Dela Cerna, nakugang ang operatiba sa dihang sa wala nila damha moabot ngadto sa kapin sa usa ka kilo ang ilang nasakmit nga shabu. Kini giingong mokantidad og P7.4 milyones. Tungod niini, ilang gikonsiderar si Rama nga usa ka hvt.

Tungod sa kadako sa ilang nasakmit, si Police Regional Office (PRO) 7 Director PBgen. Valeriano De Leon ang daling midalikyat ug misusi sa dapit. Wa mohatag og pamahayag si Rama sa dihang gipangutana sa Superbalita.

Samtang duha nga nag-live in ang nangasikop usab atol sa gihimong pagpangronda sa Drug Enforcement Unite sa Station 5 nga gipangulohan ni PMaj. Aldrin Villacampa niadtong Martes.

Ang operation, matod pa ni Villacampa, nga ilang gipahigayon kilid mismo sa Barangay Hall sa Barangay Ermita, siyudad sa Sugbo.

Ang mga dinakpan giila nga sil asi Richie Ybanez, 42, ug kapuyo niini nga si Madonna Apaap, 48, kansang balay nga gipuy-an anaa tupad ra gyud sa Barangay Hall sa Ermita.

Nasakmitan ang manag live-in og shabu nga mobalor og P41,000 mil. Dugang ni Villacampa nga nahibulong sila nga tupad lang gyud sa maong barangay hall ang panimalay sa duha ug nganong wala gyud naka matikod ang mga barangay opisyal nga makita raman ang mga tao nga mosulod sa dapit.

Apan si Ermita Barangay Capt.Mark Rizalde Miral mipasabot nga dili atubangan sa ilang balay kon di adto lang sa likod sa ilang barangay ang aktuwal nga binaligyaay sa gidiling drugas.

“Kana siya gina text ra gyud cguro na ang mopalit ingon man ang paghatagay sa kinsa man ang mopalit kanila aron dili namo mabantayan,” matod ni Miral.

Dugang ni Miral nga ang manag live-in nadakpan na diay sa milabay nga tuig ug gitoohang nakapiyansa hinungdan nga naka gawas.

“Actually, amo na nang natukhang sa una ug apil pud na sa among watchlist apan wala pa diay mohunong ni sila. Kami ra ang na giilad ani nila. (BBT)