MOABOT ngadto sa 335 ka pamilya sa dakbayan sa Sugbo nga gikan sa lainglaing barangay nga sakop sa nagkadaiyang asosasyon ang makadawat sa ilang livelihood assistance gikan sa Department of Social Welfare and Development.

Si Lea Ouano-Japson, pangulo sa Department of Social Welfare and Services (DSWS). nipahibawo nga moabot ngadto sa 18 ka asosasyon ang makakobra sa ilang tag P10,000 ubos sa Sustainable Livelihood Program sa DSWD.

Kini gilangkuban sa Sawang Blk 1 Entrepreneur (25), Tabada Fish Vendor (21), Sityo Wangyu curtain and pillow makers (Mambaling, 23), Tayong Retailers (Banilad, 10), Sawang Senior Citizen Merchandisers (19), Banilad 2 sarisari store retailer (18), Sawang Blk 4 merchandiser (12), Sawang blk 1 rice vendors (30), Mahiga fruit vendors ( Banilad, 12), Sawang Blk 2 eatery operators (10).

Malakip usab sa distribution ugmang adlawa didto sa buhatan sa DSWD 7 mao ang Sawang Blk 5 food vendor (23), Rotunda Retailers ( Banilad, 19), Mambaling sarisari store and rag makers (20), Sawang Blk 4 senior citizen vendors (22), Sawang trisikad drivers (9), Motorcycle spare parts (Banilad, 10), Sawang sityo buwaran entrepreneur (26) ug Sawang Blk 1 food vendors (26).

Ang DSWD nigahin og P3.35 milyones alang sa mga benepisyaryo aron aduna silay ikapuhonan sa ilang ginagmay nga negusyo nga magsilbi nilang kapanginabuhian.

Niadtong buwan sa Marso, ang DSWD nihatag og P2.3 milyones ngadto sa 230 ka benepisyaryo sa SLP nga gilangkuban sa 11 ka mga asosasyon sa barangay Mambaling. PAC