Balita

P1.1M suweldo sa mga Oponganon sa Tupad program nadawat na

Sunnexdesk

Nakadawat na sa ilang suweldo ang mga benepisaryo sa programa nga Tulong Panghanapbuhay sa Ating Disadvantaged/Displaced Workers (Tupad) sa Department of Labor and Employment (Dole) 7 sa taga isla sa Olango, dakbayan sa Lapu-Lapu.

Moabot sa 274 ka mga benepisaryo sa Barangay Talima ang nakadawat sa ilang suweldo sa Talima covered court human sa ilang pagtrabaho sa barangay sama sa pagpanglimpyo sud sa 10 ka adlaw.

Mokabat ang nadawat sa mga benepisaryo og P1,106,960.

Ang naasoyng programa nahimong posible sa pakigtambayayong sa Dole-7 sa buhatan ni Kongresista Paz Radaza.

Alang ni Radaza, ang naasoyng programa maoy nagsilbing dangpanan sa mga Oponganon niining panahon sa pandemiya nga kadaghanan nawagtangan gayud sa ilang mga trabaho ug panginabuhian.

Kini base usab sa mga yangongo sa mga Oponganon sa iyang paglibotlibot sa kabarangayan sa pagpang-apud-apod og mga ayudang medikal, burial, laboratory, financial, educational assistance ug uban pa gikan sa kagamhanan.

Gikan niadtong 2019, moabot na sa 20,000 ka mga Oponganon ang nakapahimulos sa maong programa, matod sa kongresista.

Giawhag ni Radaza ang katawhan sa padayong paglimpyo sa palibot bisan humana ang ilang pagtrabaho sa kabarangayan sulod sa 10 ka adlaw.

“Naningkamot gyud ta nga maka-provide ta og temporary livelihood sa mga Oponganon kay sayod kita sa kalisod karon nga panahon sa pandemic. Instead of being emotional every time makadungog ko sa mga yango-yango, naningkamot ko nga makakita ko og paagi nga makatabang nila, ug kaning programa sa DOLE maoy tubag sa temporary nga kalisod sa mga Oponganon,” matod ni Radaza sa Superbalita Cebu. (GCM)

File photo

Green light for Osmeña Blvd. sidewalk improvement

ERC to suspend operation of Wholesale Electricity Spot Market

Marcos directs review, adjustment of regional wage rates

Ex-PDEA agent claims legitimacy of docs linking Marcos to illegal drugs

Marcos vows continued support for Filipino workers