MOKABAT sa 638 ka mga pamilya nawad-an og mga pinuy-anan human masunog ang 311 ka mga balay niadtong Miyerkules sa gabii, Pebrero 26, 2020 Belgium st. Sityo Santo Niño, Barangay Suba, Siyudad sa Sugbo.

Tungod sa hitabo, ang konseho sa barangay nideklarar og state of calamity human sa emergency session sa Huwebes, Pebrero 27.

Si SFO1 Novo Erana, fire investigator, niingon nga daling nakakaylap ang kayo kay daghan sa mga balay gama sa light materials.

Ilang nadawat ang alarma mga alas 7:05 sa gabii ug gisaka ngadto sa Task Force Bravo mga alas 8:12.

Sa ilang imbestigasyon, ang kayo nagsugod sa balay ni Jerry Cabido, apan wa pa nila masayri kon unsa ang hinungdan.

Gibana-bana nga P1.5 milyones ang danyos sa sunog.

Way gikataho nga naangol o namatay sa sunog.

Si Juditho Gabisan, usa sa mga nasunogan, niingon nga naputol ang ilang panihapon kuyog ang iyang asawa ug tulo ka anak human nga nakadungog og singgit nga sunog sa ilang mga silingan.

Pagsusi sa bintana, ang dakong kalayo na ang iyang nakit-an sa gawas.”Wala na ko nahuna-hunaan, Sir, oi gawas sa pag padali sa akong mga anak ug asawa pag hakot sa among mga senina,” asoy ni Gabisan.

Samtang si Suba Barangay Captain Joel “Jojo” Sable nga nahinabi sa Superbalita Cebu, niingon nga tungod sa sunog sa iyang barangay, nagpatawag siya og emergency session sa pagdeklara na og state of calamity sa iyang barangay.

Uyon usab si Sable kon dunay ipatuman nga reblocking.

“Private nang lugara,Ang uban nga wala pa kabayad sa yuta depende na siguro na apan posibleng makabalik ra gihapon ang mga nasunogan sa dapit,” matod ni Sable.

Matag pamilya nga tag-iya sa balay makadawat gikan sa Siyudad og tag P20,000 samtang ang mga nag-abang tag P10,000. (BBT)