MOKABAT sa P1.7 milyunes nga kantidad sa pinauga nga seahorse nga nasakmit niadtong 2019, ang i-dispose o ipangdispatsar sa Bureau of Fisheries and Aquatic Resources (BFAR) 7, Huwebes, Enero 9.

Nasakmit ang maong mga dried seahorse sa tulo ka mga higayon sa 2019 diin usa niini nasakmit o nasakpan gikan sa duha ka mga Chinese nationals nga paingon unta molarga sa nasod sa Macau.

Adunay gibug-aton nga 59 kilos ang mga seahorse ug anaa sa P30,000 ang matag kilo niini.

Matod ni BFAR 7 Regional Director Alfeo Piloton nga gikan sa mga Chinese nationals ang mga seahorse nga mosuway unta kini og palusot pagawas sa nasod.

Klaro usab nga aduna’y contacts ang maong mga Chinese nationals sa Sugbo kaha sa ubang lalawigan sa Central Visayas tungod kay nakakita man kini sa maong klase sa marine animals.

Base sa Republic Act 9147 kun “Act Providing for the Conservation and Protection of Wildlife Resources and their Habitats,” gidili kining pagkuha sa maong matang sa marine animals, hilabi na nga anaa kini sa listahan sa Convention of International Trade of Endangered Species(CITES) isip endangered species.

Gipasakaan na ang duha ka Chinese nationals og administrative case sa BFAR 7 apan nakapiyansa na kini ug nimulta og P15,000.

Nakalarga na usab kini pabalik sa ilang nasod.

Matod ni Piloton nga kining gihimo nila, mahimo kining mensahe sa publiko nga ilegal kining pagpanguha og seahorse ug pagpauga niini ingon man ang pagbaligya usab niini.

“Kining 59 kilos nga atong na-confiscate ato ning i-dispose properly para mao gyud ni siya ang tama nga proseso after nato na file ang maong mga administrative charges sa ilaha,” matod ni Piloton.

Ang maong mga dried searhorse nasakpan kini sa Mactan Cebu International Airport diin nakita sa x-ray machine sa Office for Transportation Security (OTS) ug mi-responde ang ilang quarantine officers sa Bureau of Quarantine.

Gituohan nga gamit isip tambal ning dried seahorse alang sa mga Tsino. (HBL)