MOKABAT sa P190 million nga balor sa illegal nga drugas ang nasakmit sa kapulisan sa dakbayan sa Sugbo ug Consolacion atol sa duha ka mga buy bust operation.

Unang nadakpan ala 1:30 Dominggo sa kaadlawon, Marso 3, sa mga sakop sa Pardo Police Station si Elymar Ancajas 24, sa usa ka apartment may Fatima Homes,Barangay Inayawan, siyudad sa Sugbo.

Si Ancajas lumad nga taga Barangay Jugan, Consolacion.

Nakuha gikan kaniya ang 18 kilos sa gituohang shabu nga mobalor og P122,400,000.

Sa dihang gipaubos sa interogasyon, nitug-an si Ancajas diin siya magkuhaan og supply sa drugas.

Human makatug-an si Ancajas nga didto sa Consolacion gikan ang supply, nilusad na usab silag follow up operation inabagan sa kapulisan sa Consolacion pasado alas 3 kaadlawon.

Niresulta kini sa pagkasakmit sa 10 kilos nga gituohang shabu nga mobalor og P68,000,000.

Nasikop usab si Jocelyn Encila, taga Barangay Casili, lungsod sa Consolacion apan gipaubos una siya sa hospital arrest sanglit kini nagkalibanga.

Sa gihimong pagduki-duki sa kapulisan, nasuta nga si Encila igsuon ni Rustico Igot, kinsa naa sa National Bilibid Prison ug nagnegosyo og illegal nga drugas./ARNOLD Y. BUSTAMANTE/ hulagway gikan sa Facebook page ni Cebu City Councilor Joel Garganera