DUGANG 50,000 ka mga plate number ang gikatakda unta nga ipadala na dinhi sa Central Visayas, ang gipugngan una sa Land Transportation Office (LTO 7).

Ang mga plaka nga gikan sa kaulohan gipugngan una nga ma-deliver kay wa pa gani makatunga ang gidaghanon sa 52,000 ka plate numbers nga unang niabot sa ilang buhatan niadtong Pebrero ning tuiga, ang nakuha sa mga tag-iya.

Gitug-an ni LTO 7 Director, Victor Emmanuel Caindec, nga aduna pay 30,000 ka mga plaka nga nagtipun-og sa mga vehicle dealer.

Ang uban gibalik na sa buhatan sa LTO 7 human nga nagmagahi sa pagkuha niini ang car owners.

Ang maong mga plaka alang sa mga sakyanan nga nagparehistro niadtong Marso 2017 hangtod sa Mayo 2018.

Gibutyag ni Caindec nga sagad nga rason sa mga tag-iya nganong di makuha ang giingong ka-busy kun walay panahon sa pagkuha.

Matod ni Caindec nga mas gipatas-an pa nila ang pasensya, apan mohatag unya sila og deadline kon kanus-a kutob ang pagkuha sa maong mga plaka.

Kini aron paghatag og kahigayunan sa mga naka-ready na unta nga mga plaka, alang niadtong nagparehistro gikan sa Hunyo 2018 hangtod na sa 2019.

Subli nga pahinumdom ni Caindec, nga gawas sa ilang mga kawani, aduna usab sila kapin sa 400 ka mga deputized nga mga pulis nga modakop niadtong mga tag-iya’g sakyanan, kinsa way authorized nga plaka.

Ang mga nakalapas niini makamulta og P5,0000.

“Ako sa gipa-hold ang shipment kay wala pa lagi lugar. NIng-surrender naman ang mga dealer sa pag-keep. Ang problema man gud mo-receive na pud ka’g plates nga 50, 000 additional, nga wala pa namo na-liquidate ang 52,000 nga initial nga gipada. On the 52, 000 nga among gi-announce for release pag-February, naa pay gi-carry over ato nga almost 5, 000 plates,” pagpasabot ni Caindec. (FMD)