MAPAHILUNA na sa usa ka bodega nga hamugaway ug lig-on ang food items ug ubang panginahanglanon sa pag-andam sa mga kalamidad sa kagamhanan sa lalawigan sa Sugbo.

Niadtong Biyernes, Hunyo 14, gisubhan ang bag-ong pasilidad nga nagkantidad og P37.8 milyones nga gipangulohan ni outgoing gobernador ug Vice Governor-elect Hilario Davide III uban sa mga opisyal sa kagamhanan sa lalawigan sa Sugbo, ug first lady Jobel Angan-Davide.

Ang 2,564 metro kwadrado nga pasilidad naa mahimutang sa luna nga gipang-iya sa Kapitolyo sud sa karaang Department of Agriculture compound sa dan M. Velez, Barangay Guadalupe, siyudad sa Sugbo.

Kini ang giisip nga labing dako nga bodega nga gipanag-iya sa usa ka local government unit nga may gidak-on nga sama sa 10 ka basketball courts.

Si Jone Siegfred Sepe, pangu sa Provincial General Services Office, niingon ang Cebu Provincial Central Warehouse kay adunay duha ka chamber warehouse - usa ka 513 metro kwadrado nga chamber sa wala nga bahin ug 2,049 metro kwadrado chamber sa tuo nga bahin nga may gamay nga duha ka andana nga buhatan sa tungatunga.

Kini maoy magsilbi nga central warehouse alang sa stocks ug food items nga andamon sa kalamidad ug storeroom sa supplies ug ekipo sa Kapitolyo.

Sumala ni Sepe ang bag-ong bodega makasugakod og kusog nga linog ug bagyo.

“So, this will be the last building standing after a disaster,” dason ni Sepe.

Sa kasamtangan, ang mga pagkaon ug ubang supplies sa Kapitolyo alang sa kalamidad kay gipahimutang sa stockrooms sa Cebu International Convention Center sa siyudad sa Mandaue, Hope Center sa Barangay Banilad, siyudad sa Sugbo ug warehouse sa PGSO sud sa compound sa Kapitolyo.

Niabot og 180 ka adlaw ang contractor, Zumyrphil Construction Inc., sa pagtukod sa maong proyekto. (SCG)