KAPIN sa P4 milyones ang balor sa nasakmit nga shabu sa duha ka managlahing operasyon sa Cebu City Police Office (CCPO) niadtong Miyerkules sa gabii, Oktubre 9 ug Huwebes sa kaadlawon, Oktubre 10.

Tulo ang mga dinakpan nga pulos gikonsiderar nga regional level high value target sa base sa ilang gramo sa shabu nga ilang madispatsar matag adlaw.

Si John Joseph Galimba, 32, taga Barangay Lahug, siyudad sa Sugbo, nadakpan sa Barangay Kamputhaw, kinsa target sa mga operatiba sa CCPO sa ilang buy bust niadtong Miyerkules sa gabii.

Si PMaj. Randy Caballes, hepe sa City Intelligence Bureau (CIB) sa CCPO, maoy nangulo sa maong pagpangronda nga niresulta sa pagkasikop kang Galimba.

Nasakmit gikan sa dinakpan ang gibanabana sa tunga sa kilo nga shabu nga moabot na sa P3.4 milyones nga balor base sa Dangerous Drug Board (DDB) value.

Si Caballes, sa iyang habig, nibutyag sa Superbalita Cebu nga ang gihimong buy bust ngadto kang Galimba tungod sa mga impormasyon nga miabot kanila gikan sa mga hingtungdang opisyal sa Barangay Kamputhaw ug kini ilang monitor sa wala gilusad ang operasyon.

Gihulagway ni Caballes ang ilang dinakpan nga usa ka high value target.

Dugang ni Caballes nga bag-ohay lang nakagawas si Galimba gikan sa Cebu City Jail human masakpan nga naghupot og mga pakete sa shabu.

Ang dinakpan dihang gikuhaan sa iyang habig sa Superbalita Cebu wala na mokomentaryo gawas sa pag-ingon nga sa korte na kini tubagon.

Sa laing bahin, duha ang nadakpan sa laing hugna sa pagpangronda nga gikonsiderar usab nga regional level nga mga high value target.

Ang drug buy bust pasado na alas 12:00 sa kaadlawon niadtong Huwebes sa Sitio Potat, Barangay Tinago, siyudad sa Sugbo.

Giila ang mga dinakpan ni PMaj. Joemar Pomarejos, hepe sa Waterfront Police Station nga mao usab ang nangulo sa operasyon, nga sila si Wendelyn Solon, 29, ug kauban sa negosyo ni Solon nadakpan usab nga si Jonmar Pasana, 34, pulos taga Barangay Tinago, siyudad sa Sugbo.

Atol sa gihimong buy bust, nasakmit sa duha ang gibana bana moabot na sa 100 gramos nga shabu nga moabot na sa P680 mil subay sa DDB value niini.

Dugang ni Pomarejos nga usa ka semana ang ilang gi- monitor si Solon lakip na si Pasana sa ilang mga kalihokan sa druga.

Si Solon niangkon sa iyang pagkalambigit sa iyang pagpamaligya.

Kalapasan sa seksyon 5 ug 11 sa R.A. 9165 ang atubangon sa tulo ngadto sa korte.