MOABOT sa P5.3 milyunes ang giapud-apod sa Department of Labor and Employment (Dole) 7 sa dakbayan sa Lapu-Lapu alang sa cash-for-work program sa Tulong Panghanapbuhay Alang sa Displaced/Disadvantaged workers (Tupad) ug Government Internship Program (GIP).

Matod ni Kongresista Paz Radaza, kinsa maoy nakigtambayayong sa Department of Social Welfare and Development (DSWD) 7, moabot sa 1,046 ka mga benepisaryo ang nakadawat sa ilang sweldo niadtong, Sabado, Oktubre 23, ug ang 758 niini benepisaryo sa Tupad samtang 288 ang GIP.

Ang matag benepisaryo sa Tupad nakadawat og P404 nga sweldo matag adlaw, sulod sa 10 ka adlaw nga pagtrabaho samtang ang benepisaryo sa GIP susama usab og nadawat nga sweldo, apan molanat ang ilang pagtrabaho sulod sa tulo ka buwan.

Sa kinatibuk-an moabot na sa 50,000 ka mga Oponganon ang nakapahimulos sa programa sa Tupad ug GIP sukad gisugdan ni Radaza ang pakigtambayong sa Dole 7.

Samtang, gipahibawo usab sa kongresista nga ang DSWD 7 sa ilang bahin migahin usab og moabot sa P489,500 alang sa 112 ka mga benepisaryo sa dakbayan sa burial ug medical assistance ubos sa programang Assistance to Individuals in Crisis Situation (AICS).

“Kanunay gyud nako ni nga gibalik-balik nga kinahanglan mo-avail gyud mo sa services kay kini inyoha raman sad ni nga mga buwis nga amo lang gibalik diha ninyo”, matod ni Radaza sa Superbalita Cebu. (PR)