BALIK na sa naandan ang operasyon sa runway sa Mactan-Cebu International Airport (MCIA) kay nahuman na ang gitrabaho nga asphalt overlay kagahapong adlawa.

Samtang nakatampo ang bag-ong Terminal 2 sa MCIA sa dihang nasulod sa 9th place sa Top 10 “Most On-Time Airports” sa Southeast Asia sa Agusto ning tuiga.

Gipahibawo ni Atty. Steve Dicdican, general manager sa MCIA ,nga natapos ang runway rehabilitation sud sa 21 ka adlaw nga gisugdan niadtong Septiyembre 1 nga maoy ilang target date of completion.

“This is a very ambitious project for 21 days, five-hour closure. No one has done that in this country.“I don’t know in other parts of the world, we did it this way. We did it properly and successfully,” matod ni Dicdican.

Mapasalamaton ang opisyal sa tanang nahimong kabahin sa proyekto ingon man ang upat ka mga kontraktor nga taliwala sa mga kalisdanan nga ilang nasugatan ilabi na nga nagsunod-sunod ang bunok sa uwan, lakip na niadtong hulga sa Bagyong Ompong, nahuman ang pagtrabaho.

Bisan kon gilibkas na ang runway closure, giawhag ni Dicdican ang mga pasahero sa tugpahanan nga mosayo gihapon sa airport gumikan sa pagsugod sab og repair sa viaduct sa Marcelo Fernan Bridge.

Sa laing bahin, gikalipay ni Dicdican sa dihang iyang nasayran nga ang MCIA nasulod sa Top 10 “Most On-Time Airports” sa Southeast Asia sa buwan sa Agosto ning tuiga, base sa OAG usa ka air travel intelligence agency company nga nagbase sa United Kingdom.

Matod pa sa general manager sa tugpahanan nga ang katukoran sa Terminal 2 dako og natampo sa maong pasidungog sa dihang nakakuha ang MCIA og 70 porsento nga rating sa on-time performance.

“We have a new terminal nagka-daghan na ang parkingan sa atong airplanes, nagkadako na ang processing area sa passengers,” dugang pa ni Dicdican.

Siya masaligon nga sa bag-ong na-rehabilitate nga runway, makatampo sab unya kini sa susamang pasidungog.

Ang asphalt overlay adunay P255 milyones nga budget aron sa pag-ayo sa nagkanipis nga aspalto nga adunay gilapdon nga 60 metros ug 3.4 kms nga gitas-on.